ດາວທຽມດວງທຳອິດຂອງ ສປປ ລາວ (LAOSAT-1) ຂື້ນສູ່ອາວະກາດ



ດາວທຽມລາວແຊດ1 (LaoSat-1) ດວງທຳອິດຂອງປະເທດເຮົາ ໄດ້ຖືກສົ່ງຂຶ້ນສູ່ວົງໂຄຈອນທີ່ຕຳແໜ່ງ 128.5 ອົງສາ ຕາເວັນອອກ ດ້ວຍຜົນສຳເລັດ, ຊຶ່ງພິທີທາງການ ໄດ້ຈັດຂຶ້ນເມື່ອວັນທີ 21 ພະຈິກ 2015 ເວລາ 00:25 ໂມງ ຕາມເວລາທ້ອງຖິ່ນ ທີ່ສູນປ່ອຍດາວທຽມ ເມືອງຊີຊາງ, ແຂວງ ເສສວນ, ສປ ຈີນ, ກົງກັບເວລາ 23:25 ໂມງ ຂອງປະເທດລາວ ແລະ ດາວທຽມ ໄດ້ຖືກບັນຊາໃຫ້ເຂົ້າສູ່ວົງໂຄຈອນສຳເລັດຢ່າງສົມບູນ ເມື່ອວັນທີ 27 ພະຈິກ 2015.

ໂຄງການດາວທຽມລາວ ເປັນໂຄງການຮ່ວມມືຍຸດທະສາດ ລະຫວ່າງ ສອງພັກ-ລັດຖະບານ ສປປ ລາວ ແລະ ສປ ຈີນ ຊຶ່ງລັດຖະບານລາວ ໄດ້ເລີ່ມຄົ້ນຄວ້າໂຄງການມາແຕ່ ປີ 2008 ແລະ ໄດ້ມີການເຊັນສັນຍາກໍ່ສ້າງ ແລະ ດຳເນີນທຸລະກິດໂຄງການດາວທຽມລາວ ໃນວັນທີ 25 ກຸມພາ 2010.ພາຍຫຼັງສ້າງຕັ້ງກະຊວງ ປທສ ໃນເດືອນສິງຫາ2011, ກະຊວງ ປທສ ກໍໄດ້ຮັບມອບໝາຍໃຫ້ສືບຕໍ່ປະຕິບັດໂຄງການດາວທຽມລາວ ຈາກກະຊວງວິທະຍາສາດ ແລະ ເຕັກໂນໂລຊີ ຊຶ່ງໃນນັ້ນ ໄດ້ເລັ່ງດຳເນີນການວຽກງານຕ່າງໆທີ່ກ່ຽວຂ້ອງ ເປັນຕົ້ນ ການກະກຽມດາວທຽມ ແລະ ຍານສົ່ງ, ການປະສານງານເຄືອຂ່າຍດາວທຽມ ລາວ, ການປະກັນໄພ, ການປັບປຸງກໍ່ສ້າງສະຖານີ, ລະບົບບັນຊາການດາວທຽມ, ລະບົບວິທະຍຸໂທລະພາບ ແລະ ໂທລະຄົມມະນາຄົມ ພາກພື້ນດິນ, ແລະ ການກໍ່ສ້າງບຳລຸງພະນັກງານບັນຊາ ແລະ ຄຸ້ມຄອງ ໃຫ້ມີຄວາມພ້ອມ. ສະຖານນີບັນຊາການພາກພື້ນດິນ ຂອງດາວທຽມລາວ ແມ່ນຕັ້ງຢູ່ເມືອງຫາດຊາຍຟອງ ຊຶ່ງ ປະກອບດ້ວຍລະບົບບັນຊາ, ລະບົບໂທລະພາບ ແລະ ໂທລະຄົມມະນາຄົມ, ເຄືອຂ່າຍສື່ສານບໍ່ໃຊ້ສາຍຄວາມໄວສູງ. ມີບຸກຄະລາກອນທັງໝົດຈຳນວນ 50 ຄົນ ປະຈຳທີ່ສູນບັນຊາການ. ຈຸດພິເສດຂອງດາວທຽມລາວ ແມ່ນໃຫ້ບໍລິການລະບົບໂທລະຄົມມະນາຄົມ ແລະ ກະຈາຍສັນຍານໂທລະພາບ ທີ່ຮອງຮັບທັງລະບົບ Ku band ແລະ C band, ມີຊ່ອງສັນຍານທັງໝົດ 22 ຊ່ອງ (Transponders) ຊຶ່ງຈະນຳໃຊ້ເຂົ້າໃນວຽກງານສື່ສານຂອງພາກລັດ ແລະ ສັງຄົມທົ່ວໄປ. ດາວທຽມລາວ ດວງທຳອິດນີ້ ສາມາດໃຫ້ເຊົ່າຊ່ອງສັນຍານແກ່ຕ່າງປະເທດ, ບໍລິການຜ່ານດາວທຽມວຽກງານສື່ສານໃນເຂດຊົນນະບົດ, ບໍລິການໂທລະພາບຜ່ານດາວທຽມ ເພື່ອການສຶກສາ, ການແພດ, ການສື່ສານສຸກເສີນ ແລະ ໄພພິບັດຕ່າງໆ.



ດາວທຽມລາວ ມີອາຍຸການນຳໃຊ້ 15 ປີ, ມີ ການສ້າງລັດວິສະຫະກິດ ເພື່ອບໍລິຫານດາວທຽມ ໂດຍມີຜູ່ຮ່ວມທຶນຄື:

- ລັດຖະບານລາວຖືຫຸ້ນ 45%

- ບໍລິສັດໂທລະຄົມຈີນ (APMT) 35%

- ບໍລິສັດກຸ່ມອາວະກາດຈີນ 15%

- ບໍລິສັດເຕັກໂນໂລຊີດາວທຽມຮົງກົງ 5%

ພາຍຫຼັງ ສປ ຈີນ ໄດ້ໂອນການບັນຊາມາໃຫ້ສະຖານີດາວທຽມພາກພື້ນດິນຂອງລາວ, ລາວໄດ້ເລີ່ມທົດລອງນຳໃຊ້ ແລະ ໄດ້ເຮັດໜ້າທີ່ ຖ່າຍທອດງານສະເຫຼີມສະຫຼອງ ວັນຊາດ ທີ 2 ທັນວາ ຄົບຮອບ 40 ປີ ຊຶ່ງສາມາດຖ່າຍທອດສັນຍານໄດ້ຢ່າງຈົບງາມ ແລະ ໄດ້ຮັບການຕອບຮັບເປັນຢ່າງດີ. ລັດຖະບານລາວແມ່ນມີຄວາມພາກພູມໃຈຕໍ່ການຈັດຕັ້ງປະຕິບັດໂຄງການນີ້ ຊຶ່ງໄດ້ຮັບຜົນສຳເລັດຕາມ ແຜນການ, ໂຄງການນີ້ຈະສ້າງລາຍຮັບທີ່ສຳຄັນສຳລັບປະເທດລາວຂອງພວກເຮົາ ແລະ ຈະກາຍເປັນໂຄງລ່າງພື້ນຖານທີ່ສຳຄັນອັນໜຶ່ງ ສຳລັບວຽກງານໂທລະຄົມມະນາຄົມ ແລະ ການສື່ສານ, ການກະຈາຍສຽງ-ໂທລະພາບ ເນື່ອງຈາກວ່າດາວທຽມລາວນີ້ມີສັນຍານ ກວມເອົາທຸກພື້ນທີ່ຂອງ ສປປ ລາວ ແລະ ບັນດາປະເທດອາຊຽນ. ພ້ອມນັ້ນ, ໂດຍທາງກົງ ຫຼື ທາງອ້ອມ ກໍຈະເປັນສິ່ງກະຕຸກຊຸກຍູ້ ໃຫ້ເສດຖະກິດແຫ່ງຊາດມີການຂະຫຍາຍຕົວ ສົ່ງເສີມການພັດທະນາຊັບພະຍາກອນມະນຸດ ແລະ ມີທ່າແຮງຫຼາຍກວ່າເກົ່າ.



ຜູ້ສະຫນັບສະຫນູນ

ຈຳນວນຜູ້ເຂົ້າຊົມເວັບໄຊ

ມື້ນີ້   11
ມື້ວານນີ້   24
ອາທິດນີ້   489
ອາທິດແລ້ວນີ້   971
ເດືອນນີ້   2777
ເດືອນແລ້ວນີ້   8303
ທັງຫມົດ   38311

ຕິດຕໍ່ພວກເຮົາ

>