ພິທີຖະແຫລງຂ່າວການແຂ່ງຂັນ ແລະ ຄັດເລືອກຜະລິດຕະພັນ ໄອຊີທີ ເຂົ້າປະກວດໃນໂຄງການ ASEAN ICT AWARDS 2016



ກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ຈັດພິທີຖະແຫລງຂ່າວການແຂ່ງຂັນ ແລະ ຄັດເລືອກຜະລິດຕະພັນ ໄອຊີທີເຂົ້າປະກວດໃນໂຄງການ ອາຊຽນ ໄອຊີທີ ອາວອດ 2016 (ASEAN ICT AWARD 2016). ເຊິ່ງພິທີດັ່ງກ່າວ ໄດ້ຈັດຂຶ້ນໃນວັນທີ 11 ພຶດສະພາ 2016 ທີ່ ສະຖາບັນໄປສະນີ ໂທລະຄົມມະນາຄົມ ແລະ ການສື່ສານ ໂດຍ ທ່ານ ທະນົງເດືອນ ຕຸລິຫົງ ຮອງຫົວຫນ້າ ກົມເຕັກໂນໂລຊີຂໍ້ມູນຂ່າວສານ ແລະ ທ່ານ ນາງ ເກສອນ ສຸລິວົງ ຮອງ ຫົວຫນ້າກົມ ແຜນການ ແລະ ການຮ່ວມມື ຂອງ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ເປັນປະທານໃນການເປີດພິທີຄັ້ງນີ້.

ພາຍໃນງານຖະແຫລງຂ່າວ ທ່ານ ນາງ ເກສອນ ສຸລິວົງ ໄດ້ກ່າວເຖິງປະຫວັດຄວາມເປັນມາຂອງງານໄອຊີທີອາວອດວ່າ ງານໄອຊີທີ ອາວອດນີ້ແມ່ນຈັດຕັ້ງຂຶ້ນຕັ້ງແຕ່ປີ 2012 ເປັນຕົ້ນມາ. ໃນງານປະກວດຜ່ານມາ ປະເທດລາວເຮົາ ກໍ່ເຄີຍສົ່ງຜະລິດຕະພັນເຂົ້້າປະກວດ ໃນງານໄອຊີທີອາວອດ ເຊິ່ງກໍ່ເຄີຍໄດ້ຮັບລາງວັນອັບດັບທີ 1 ໃນດ້ານເນື້ອຫາດິຈິຕອນ (Digital Content) ໂດຍ ທາງບໍລິສັດ IT Development ໃນປີ 2012 ແລະ ລາງວັນອັນດັບທີ 3 ໃນດ້ານ ການວິໄຈ ແລະ ພັດທະນາ (Research and Development) ໂດຍ ທາງສູນບໍລິຫານລັດ ດ້ວຍ ເອເລັກໂຕນິກ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ໃນປີ 2013



ການແຂ່ງຂັນ ICT AWARD ຄັ້ງນີ້ ແມ່ນໄດ້ຈັດຂຶ້ນເປັນຄັ້ງທີ V ເຊິ່ງ ປະກອບມີ 6 ປະເພດຄື: ພາກລັດ (Public Sector), ພາກເອກະຊົນ (Private Sector), ຄວາມຮັບຜິດຊອບຕໍ່ສັງຄົມ (Corporate Social Responsibility), ເນື້ອຫາ ດິຈິຕອນ (Digital Content), Start-up ແລະ ການວິໄຈ ແລະ ພັດທະນາ (Research and Development).

ການແຂ່ງຂັນດັ່ງກ່າວໄດ້ເລີ່ມເປີດສະຫມັກໃນວັນທີ 9 ພຶດສະພາ ແລະ ປິດຮັບສະຫມັກໃນວັນທີ 6 ມິຖຸນາ 2016 ນີ້. ສ່ວນຮອບ ຄັດເລືອກແມ່ນຈະໄດ້ຈັດຂຶ້ນໃນວັນທີ່ 9-10 ມິຖຸນາ 2016 ແລະ ຈະມີການປະກາດຜົນໃນວັນທີ 15 ມິຖຸນາ 2016. ຫລັງຈາກ ນັ້ນແມ່ນຈະໄດ້ນຳສົ່ງຜົນງານທີ່ໄດ້ຮັບຄັດເລືອກ ເຂົ້າປະກວດໃນລະດັບ ອາຊ່ຽນ ໃນວັນທີ 17 ມິຖຸນາ 2016. ຕໍ່ຈາກນັ້ນ ຈະມີການ ຕັດສິນຮອບທຳອິດ (ແບບອອນລາຍ) ພາຍໃນລະຫວ່າງເດືອນ ມິຖຸນາ ຫາ ເດືອນ ກໍລະກົດ ແລະ ຈະມີການຕັດສິນຮອບສຸດທ້າຍ ໃນເດືອນ ສິງຫາ ປີ 2016 ທີ່ ປະເທດມຽນມາ ແລະ ຈະມີພິທີ ມອບລາງວັນ ໃນເດືອນ ພະຈິກ 20116 ທີ່ປະເທດ ບຣູໄນ.

ການແຂ່ງຂັນ ASEAN ICT AWARD ນີ້ໄດ້ເປັນບາດກ້າວຫນຶ່ງທີ່ສຳຄັນໃນການຊ່ວຍກະຕຸກຊຸກຍູ້ວຽກງານດ້ານ ໄອຊີທີ ບໍ່ວ່າຈະເປັນທາງພາກລັດ ແລະ ເອກະຊົນ ໃຫ້ມີຄວາມເຂັ້ມແຂງ, ຊຸກຍູ້ບຸກຄະລາກອນທາງດ້ານໄອຊີທີ ໃຫ້ມີຄວາມກ້າວຫນ້າ ແລະ ພັດທະນາລະບົບ ໄອຊີທີ ຂອງລາວ ໃຫ້ເຂົ້າສູ່ຕະຫລາດໄອຊີທີ ທັງພາຍໃນ ແລະ ຕ່າງປະເທດ.



ຜູ້ສະຫນັບສະຫນູນ

ຈຳນວນຜູ້ເຂົ້າຊົມເວັບໄຊ

ມື້ນີ້   11
ມື້ວານນີ້   24
ອາທິດນີ້   489
ອາທິດແລ້ວນີ້   971
ເດືອນນີ້   2777
ເດືອນແລ້ວນີ້   8303
ທັງຫມົດ   38311

ຕິດຕໍ່ພວກເຮົາ

>