ກອງປະຊຸມ ກວດກາເນື້ອໃນຮອບດ້ານ ຮ່າງກົດໝາຍ ICT ທີ່ ທ່າລາດ, ແຂວງວຽງຈັນ.



ໃນວັນທີ 26 ພຶດສະພາ 2016 ໄດ້ມີການເປີດກອງປະຊຸມ ກວດກາເນື້ອໃນຮອບດ້ານ ຂອງຮ່າງກົດໝາຍ ວ່າດ້ວຍ ເຕັກໂນໂລຊີການສື່ສານຂໍ້ມູນຂ່າວສານ ຫຼື ເອີ້ນວ່າ ICT ຈັດໂດຍ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ໂດຍການເປັນປະທານຂອງ ທ່ານ ສາຍທອງ ແກ້ວດວງດີ, ປະທານກໍາມະທິການກົດໝາຍ, ທ່ານ ທອງໃສ ຊານໄຊຍະ, ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ບັນດາຮອງປະທານ ກໍາມະທິການ ສະພາແຫ່ງຊາດ, ນັກຊ່ຽວຊານດ້ານກົດໝາຍ ພ້ອມດ້ວຍທ່ານຫົວໜ້າກົມ, ຮອງກົມ ແລະ ຄະນະກອງປະຊຸມເຂົ້າຮ່ວມ ລວມທັງໝົດກວ່າ 70 ທ່ານ.

ຮ່າງກົດໝາຍດັ່ງກ່າວ ໄດ້ເລີ່ມດຳເນີນການສຶກສາຄົ້ນຄວ້າມາແຕ່ປີ 2013 ໂດຍອີງໃສ່ແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດ ຊຸດທີ VII ( 2011-2015). ຫຼັງຈາກຄະນະຮັບຜິດຊອບໄດ້ຮ່າງສຳເລັດຂັ້ນພື້ນຖານ ກໍໄດ້ສົ່ງຮ່າງກົດໝາຍ ໃຫ້ພະແນກ ປທສ ແຂວງ ໃນຂອບເຂດທົ່ວປະເທດ ເພື່ອປະກອບຄຳເຫັນ, ໄດ້ຈັດກອງປະຊຸມເປີດກ້ວາງ ກັບບັນດາຜູ້ດຳເນີນກິດຈະການ ໂທລະຄົມມະນາຄົມ ແລະ ເຕັກໂນໂລຊີຂໍ້ມູນ, ໄດ້ຈັດກອງປະຊຸມຮຽບຮຽງຮ່າງກົດໝາຍ ຮ່ວມກັບບັນດາກະຊວງກ່ຽວຂ້ອງ ຫຼາຍຄັ້ງ, ສຸດທ້າຍໄດ້ສະເໜີຮ່າງກົດໝາຍໃນກອງປະຊຸມລັດຖະບານສະໄໝສາມັນ ປະຈຳເດືອນ 10 ປີ 2015, ຊຶ່ງກອງປະຊຸມລັດຖະບານ ໄດ້ເຫັນດີເປັນເອກະພາບ ນຳສົ່ງກົດໝາຍ ເຖິງສະພາແຫ່ງຊາດ ເພື່ອພິຈາລະນາຕໍ່ໄປ.

ຮ່າງກົດໝາຍສະບັບນີ້ ປະກອບມີ 12 ພາກ, 6 ໝວດ ແລະ 71 ມາດຕາ, ມີຈຸດປະສົງເພື່ອກຳນົດຫຼັກການ, ລະບຽບ ແລະ ມາດຕະຖານກ່ຽວກັບການຄຸ້ມຄອງ, ການຕິດຕາມກວດກາວຽກງານ ICT ເພື່ອເຮັດໃຫ້ວຽກງານດັງກ່າວໄດ້ຮັບການພັດທະນາຢ່າງເປັນ ລະບົບ, ມີຄຸນນະພາບ, ປອດໄພ ແລະ ສົ່ງເສີມ ICT ເຂົ້າໃນການຫັນເປັນອຸດສະຫະກໍາ ແລະ ຫັນເປັນທັນສະໄໝ ແນ່ໃສ່ປົກປ້ອງສິດ ແລະ ຜົນປະໂຫຍດຂອງລັດ, ບຸກຄົນ, ນິຕິບຸກຄົນ ແລະ ການຈັດຕັ້ງ, ປະເທດຊາດມີຄວາມໝັ້ນຄົງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ຍຸຕິທໍາ, ສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າໃນການພັດທະນາເສດຖະ ກິດ-ສັງຄົມຂອງຊາດ.

ພາຍຫຼັງສຳເລັດ ກອງປະຊຸມກວດກາເນື້ອໃນຮອບດ້ານ ຄະນະຮັບຜິດຊອບຮ່າງກົດໝາຍ ຈະໄດ້ນຳຄຳເຫັນຂອງ ຜູ້ແທນມາຄົ້ນຄ້ວາ ແລະ ປັບປຸງຕື່ມເພື່ອນຳເຂົ້າຜ່ານກອງປະຊຸມສະພາສະໄໝສາມັນຄັ້ງທີ່ 1 ຂອງສະພາແຫ່ງຊາດຊຸດທີ່ VIII ຊຶ່ງຈະຈັດຂຶ້ນໃນເດືອນຕຸລາ 2016 ນີ້.



ຜູ້ສະຫນັບສະຫນູນ

ຈຳນວນຜູ້ເຂົ້າຊົມເວັບໄຊ

ມື້ນີ້   10
ມື້ວານນີ້   24
ອາທິດນີ້   488
ອາທິດແລ້ວນີ້   971
ເດືອນນີ້   2776
ເດືອນແລ້ວນີ້   8303
ທັງຫມົດ   38310

ຕິດຕໍ່ພວກເຮົາ

>