ກອງປະຊຸມເປີດກວ້າງຮ່າງດໍາລັດ ວ່າດ້ວຍສູນຂໍ້ມູນຂ່າວສານ



ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກອງປະຊຸມເປີດກວ້າງເນື້ອໃນວິຊາການກ່ຽວກັບ ຮ່າງດໍາລັດວ່າດ້ວຍສູນຂໍ້ມູນຂ່າວສານ ຂຶ້ນໃນວັນທີ 13 ກໍລະກົດ 2016 ທີ່ສະຖາບັນ ໄປສະນີ ໂທລະຄົມມະນາຄົມ ແລະ ການສື່ສານ, ໂດຍການເປັນປະທານຂອງ ທ່ານ ທອງໃສ ຊານໄຊຍະ ຮອງເລຂາຄະນະພັກ, ຮອງລັດຖະມົນຕີກະຊວງ ປທສ, ພ້ອມດ້ວຍພາກສ່ວນ ທີ່ກ່ຽວຂ້ອງຈາກທຸກກະຊວງ ແລະ ອົງການຈັດຕັ້ງລັດ.

ໃນກອງປະຊຸມ, ທ່ານ ປະທານ ໄດ້ຍົກໃຫ້ເຫັນ ເຕັກໂນໂລຊີການສື່ສານຂໍ້ມູນຂ່າວສານ ຫຼື ICT ໃນປະຈຸບັນ ເປັນເຕັກໂນໂລຊີ ທີ່ທັນສະໄໝ ແລະ ກ້າວໜ້າທີ່ສຸດ ນັບມື້ນັບມີບົດບາດສຳຄັນໃນຊີວິດປະຈຳວັນ ເພື່ອຊ່ວຍສະຕິປັນຍາ ແລະ ມັນສະໝອງຂອງມະນຸດ. ICT ໄດ້ຖືກນໍາໃຊ້ເຂົ້າໃນວຽກງານຄຸ້ມຄອງບໍລິຫານ, ປ້ອງກັນຊາດ-ປ້ອງກັນຄວາມສະຫງົບ, ວັດທະນະທຳ, ການຄ້າ, ການເງິນ, ການບໍລິການ, ການສຶກສາ, ສາທາລະນະສຸກ, ການເຜີຍແຜ່ຂໍ້ມູນຂ່າວສານ ແລະ ວຽກງານພັດທະນາເສດຖະກິດ-ສັງຄົມອື່ນໆ. ສູນຂໍ້ມູນຂ່າວສານກໍເປັນເຕັກໂນໂລຊີໜຶ່ງທີ່ມີການນໍາໃຊ້ຢ່າງກວ້າງຂວາງທັງໃນພາກລັດ ແລະ ເອກະຊົນ ເພື່ອເກັບຂໍ້ມູນ-ຂ່າວສານ ຮັບໃຊ້ໃນການແລກປ່ຽນ, ເຜີຍແຜ່ ແລະ ໃຫ້ບໍລິການແກ່ສັງຄົມ. ໃນໄລຍະທີ່ຜ່ານມາ, ການນໍາໃຊ້ສູນຂໍ້ມູນຂ່າວສານຍັງມີລັກສະນະ ກະແຈກກະຈາຍ, ບໍ່ມີມາດຕະຖານລວມ ແລະ ບໍ່ສາມາດເຊື່ອມຕໍ່ກັນໄດ້ຢ່າງມີປະສິດທິພາບ, ໃນການສ້າງສູນຂໍ້ມູນຂ່າວສານຂອງພາກ ສ່ວນລັດ ກໍຍັງບໍ່ມີແບບແຜນລວມສູນ ແລະ ເອກະພາບກັນ, ການສ້າງ ແລະ ໃຫ້ບໍລິການຮັບຝາກຂໍ້ມູນ, ການບໍລິການຂໍ້ມູນຂ່າວສານ ຍັງບໍ່ສາມາດປະຕິບັດໄດ້ຢ່າງທົ່ວເຖິງ ພ້ອມນັ້ນການດໍາເນີນທຸລະກິດດ້ານສູນຂໍ້ມູນ ແລະ ສູນຂ່າວສານຂອງພາກເອກະຊົນ ກໍມີການດໍາເນີນທຸລະກິດຢ່າງຊະຊາຍ ຊຶ່ງສົ່ງຜົນກະທົບຕໍ່ການເກັບລາຍຮັບເຂົ້າລັດບໍ່ໄດ້ເທົ່າທີ່ຄວນ, ຫຍຸ້ງຍາກໃນການເກັບສະຖິຕິ ເພື່ອປະເມີນຜົນການພັດທະນາຂອງຂະແໜງການ ICT ແລະ ບໍ່ສາມາດຮັບປະກັນຄຸນນະພາບຂອງການບໍລິການ.



ໃນກອງປະຊຸມເປີດກວ້າງຄັ້ງນີ້ ທ່ານ ປອ ທະວີສັກ ມະໂນທັມ ຮັກສາການຫົວໜ້າກົມເຕັກໂນໂລຊີຂໍ້ມູນຂ່າວສານໄດ້ສະເໜີກ່ຽວກັບ ສະພາບລວມ ວຽກງານການພັດທະນາ ແລະ ນໍາໃຊ້ສູນຂໍ້ມູນຂ່າວສານຢູ່ລາວ ພ້ອມນັ້ນກໍໄດ້ຍົກໃຫ້ເຫັນເປົ້າໝາຍ ແລະ ສິ່ງທີ່ຈະ ໄດ້ຮັບຂອງດໍາລັດສະບັບນີ້. ຈາກນັ້ນກອງປະຊຸມໄດ້ປຶກສາຫາລືທາງດ້ານວິຊາການກ່ຽວກັບເນື້ອໃນຂອງ ດໍາລັດ, ການກຳນົດຫຼັກການ, ລະບຽບການ ແລະ ມາດຕະການກ່ຽວກັບ ການຄຸ້ມຄອງ, ການຕິດຕາມກວດກາສູນຂໍ້ມູນຂ່າວສານເພື່ອເຮັດໃຫ້ວຽກງານດັ່ງກ່າວໄດ້ຮັບ ການພັດທະນາຢ່າງເປັນລະບົບ, ມີຄຸນນະພາບ, ປອດໄພ ແລະ ສົ່ງເສີມ ການຫັນເປັນອຸດສາຫະກໍາ ແລະ ຫັນເປັນທັນສະໄໝ ແນໃສ່ປົກປ້ອງສິດ ແລະ ຜົນປະໂຫຍດຂອງລັດ, ບຸກຄົນ, ນິຕິບຸກຄົນ ແລະ ການຈັດຕັ້ງ, ປະເທດຊາດມີຄວາມໝັ້ນຄົງ, ສັງຄົມ ມີຄວາມສະຫງົບ, ເປັນລະບຽບຮຽບຮ້ອຍ ແລະ ຍຸຕິທຳ, ສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າ ໃນການພັດທະນາເສດຖະກິດ-ສັງຄົມຂອງຊາດ.



ຜູ້ສະຫນັບສະຫນູນ

ຈຳນວນຜູ້ເຂົ້າຊົມເວັບໄຊ

ມື້ນີ້   10
ມື້ວານນີ້   24
ອາທິດນີ້   488
ອາທິດແລ້ວນີ້   971
ເດືອນນີ້   2776
ເດືອນແລ້ວນີ້   8303
ທັງຫມົດ   38310

ຕິດຕໍ່ພວກເຮົາ

>